როგორ შევარჩიოთ სათამაშო ბავშვისთვის?

შეგიმჩნევიათ, რომ ბავშვები, ხშირად, სათამაშოებს გამოგონილ, უცნაურ სახელებს
არქმევენ, ზრუნავენ მათზე და სწავლობენ ურთიერთობებს?
სათამაშო - ეს არის წარმოსახვის, გამოხატვის, შემოქმედების და ექსპერიმენტების საუკეთესო საშუალება. ის არის ერთგვარი ფუნჯი ბავშვებისთვის, რომ გადმოსცენ საკუთარი ემოციები და სამყაროს საკუთარი ხმა გააგონონ. თამაში კი, მათი ყველაზე სერიოზული საქმიანობაა. დიახ, საქმიანობაა, თანაც სერიოზული. ამ დროს ბავშვი სწავლობს და ვითარდება. ასე რომ, ბავშვისთვის თამაში და სწორი სათამაშო უმნიშვნელოვანესია.
მოგეხსენებათ ჩვილები პატარა მკვლევარები არიან, რომლებიც ძირითადად თამაშით სწავლობენ ერთი შეხედვით ბევრ უმნიშვნელო დეტალს. სინამდვილეში თამაშით განვითარებული უნარებით რეაგირებს დაძახებაზეც კი. ხმოვანი და მანათობელი ეფექტების მქონე სათამაშოები თქვენი პატარების განვითარებისთვის უმნიშვნელოვანესია. შეიძლება ფიქრობდეთ რომ პატარასთვის სათამაშოს არჩევა მარტივია, მაგრამ ეს პროცესი საკმაოდ რთული და დასაფიქრებელია. ამ ბლოგში გაიგებთ რამდენად მნიშვნელოვანია ბავშვისთვის სწორად შერჩეული სათამაშო. ასევე ბლოგის წაკითვის შემდეგ გაგიმარტივდებათ სათამაშოს არჩევის პროცესიც.
სათამაშოს საყიდლად წასულ მშობელს უკვე განსაზღვრული უნდა ქონდეს თუ რისთვის ყიდულობს ამ სათამაშოს და კონკრეტულად რა უნარების განვითარება სურს შერჩეული სათამაშოთი. სათამაშოს ასაკთან შესაფერისობასთან ერთად აუცილებლად უნდა დავაკვირდეთ ეტიკეტს. ხშირად სათამაშოები შეიცავენ ტყვიას, თუთიას და სხვა უამრავ ჯანმრთელობისთვის საშიშ ნივთიერებას.

ამიტომ აუცილებელია ეტიკეტზე ამოიკითხოთ 

• BPA FREE წარწერა. BPA FREE ნიშნავს, რომ პროდუქტი არ შეიცავს ბიფენოლ A-ს. BPA არის ინდუსტრიული ქიმიკატი, რომელიც  ხშირად გამოიყენება პლასტმასის წარმოებაში. შესაბამისად, BPA FREE სათამაშოები ბავშვებისთვის უვნებელია.

• ასევე უნდა მოძებნოთ ნიშანი CE - სერთიფიკატი მიგითითებს რომ სათამაშო სრულად შეესაბამება ევროპულ სტანდარტს პროდუქტის უსაფრთხოების შესახებ. 

• შემდეგია EN71 სტანდარტი, რაც ნიშნავს რომ პროდუქტი სერთიფიცირებულია და აკმაყოფილებს ხარისხის სტანდარტების ყველა მოთხოვნას. 

0-12 თვე

შეიძლება ითქვას რომ ყველაზე რთული ასაკობრივი ჯგუფია სათამაშოს ასარჩევად, იქიდან გამომდინარე რომ 3 თვემდე ახალშობილს ბევრი რამის გაკეთება არ შეუძლია. აუცილებლად გაითვალისწინეთ რომ ამ ასაკის ბავშვისთვის არჩეული სათამაშო არ უნდა შეიცავდეს მცირე ნაწილებს, რათა პატარამ ვერ შეძლოს მისი გადაყლაპვა. არჩევამდე დასვით შემდეგი კითხვები და თუ პასუხი დადებითია, მაშინ ეს სათამაშო იდეალურია ახალშობილისთვის: გამოსცემს ხმებს? უსაფრთხოა ბავშვისთვის პირში ჩასადებად? შეძლებს ღრძილების მოქავებას? აქვს თუ არა მკვეთრი ფერები ან გამოკვეთილი ნახატები, რომელსაც ბავშვი დაბინდული მხედველობის მიუხედავად აღიქვამს? ამ ასაკში ბავშვები სამყაროს აღქმას იწყებენ, ამიტომ მათთვის შესაფერისია

• განმავითარებელი ხალიჩა - არჩევის პროცესში უპირატესობა მიანიჭეთ ხალიჩის მკვეთრ და კონტრასტულ ფერებს. დაბადების პირველივე დღეებიდან მათ შეუძლიათ ზურგზე წოლა და ზემოთ ჩამოკიდებული ფერადი სათამაშოების დაკვირვება. ბავშვის ხალიჩა დაგეხმარებათ განავითაროთ ბავშვის ხელებისა და თვალის კოორდინაციაში. განსავითარებელ ხალიჩაზე დამაგრებული ფერადი და მოძრავი სათამაშოები, პატარას ეხმარება ფერებისა და ფიგურების აღქმაში, რის შემდეგაც პატარა ხელების მოძრაობას იწყებს. პატარას სურვილი უჩნდება ხელი მოკიდოს მისთვის სრულიად უცხო ახალ ნივთს. შესაბამისად, თავისუფლად შეგვიძლია ვთქვათ რომ განსავითარებელი ხალიჩა ეხმარება ჩვილებს ხელის მოტორიკის განვითარებაში. ასევე არსებობს მუსიკალური ხალიჩა, რომელსაც ძირითადად უამრავი განათება, ფერები, ღილაკები, ბგერები და მელოდიები აქვს. ბავშვის ხალიჩა ასევე დიდ როლს თამაშობს თქვენი პატარას კუნთების განვითარებაში. 

• რბილი და ფერადი სათამაშოები - ხელს უწყობენ სმენის, მხედველობის და შეხების განვითარებას
  

• საღეჭი სათამაშოები - ღრძილების მოსაქავებლად
  

• არამტვრევადი სარკე - ხშირად ასეთი სარკე დამაგრებულია ფუმფულა სათამაშოებზე, ბავშვისთვის საინტერესო და შემეცნებითია სარკეში თავისივე ანარეკლის აღმოჩენა, ეს პატარა დეტალი საკუთარი სხეულის შეცნობაში ეხმარება. 
  

• ვინილის ფერადი წიგნები - ვინილის წიგნები, როგორც წესი, ძალიან ფერადია და შეიცავს დიდ, მკაფიო სურათებს, რაც ხელს უწლიდს ბავშვის ვიზუალურ განვითარებას. კონტრასტული ფერები და ნათელი სურათები იპყრობს ბავშვის ყურადღებას და ეხმარება მას გარემოს აღქმაში.
  

ამ ასაკში პატარებს ასევე შეუძლიათ მარტივი მელოდიების მოსმენაც. პატარას განვითარებისთვის იდეალურია საწოლის თავზე განთავსებული სათამაშოები, რომელიც მოძრაობითა და სიფერადით  იქცევს ძირითადად მის ყურადღებას.

სათამაშოს იდეები წლის ბავშვისთვის 

• რგოლების პირამიდა - სიდიდის მიხედვით რგოლების ჯოხზე განთავსება ხელს უწყობს ბავშვის მოტორიკისა და ლოგიკური აზროვნების განვითარებას.

• ხის კუბი სხვადასხვა ფორმის ჭრილებით - სხვადასხვა ფორმების ჭრილში განთავსება ხელს უწყობს ბავშვის ლოგიკურ განვითარებასა და ასწავლის პრობლემის გადაჭრის გზებს. 
  

• მექანიკური საგორაო მანქანები - იქიდან გამომდინარე რომ ამ ასაკის პატარა ძირითადად სულ ხოხავს, მექანიკური საგორაო მანქანა ხელს უწყობს მოტორიკის განვითარებას. 
  

• ფერადი კუბიკები - ალბათ შეგიმჩნევიათ პატარების სიყვარული სხვადასხვა ნივთების დაშლის მიმართ. დაშლა, შეკრება, ამოღება, უკან დაბრუნება და თავიდან ყველაფრის აწყობა პატარების ერთ-ერთი საყვარელი აქტივობაა. კუბიკების მსგავსი სათამაშოები, სადაც ბავშვი თავის სურვილიდან გამომდინარე აძლევს  ფორმას სათამაშოს, მისი ფანტაზიისა და წარმოსახვის განვითარების უწყობს ხელს.
  

• ფერადი და ხმოვანი სათამაშოები ამ ასაკისთვისაც აქტუალური და საჭიროა.
  

 2-3 წლის ბავშვებისთვის უკვე როლური სათამაშოების მორგების დრო დგება. თოჯინები და რბილი სათამაშოები, სამზარეულოები და მასთან დაკავშირებული აქსესუარები, სათამაშო ტრასები, ექიმობანა და სხვა უამრავი პროფესია ბავშვს სამყაროს სრულფასოვან წევრად აგრძნობინებს თავს. სხვადასხვა როლური თამაშით იდეალურად შეიმეცნებს სამყაროს, სწავლობს პრობლემის გადაჭრას,ასევე უვითარდება წარმოსახვის უნარები. რაც შეეხება ფუმფულა სათამაშოებსა და თოჯინებს მათი მნიშვნელობა ბავშვისთვის იმაზე დიდია ვიდრე წარმოგვიდგენია. სწორედ მათი მეშვეობით ეჩვევიან ჩვენი პატარები სხვაზე ზრუნვას და სხვადასხვა ემოციების განვითარებასა და კონტროლს.

სკოლამდელი ასაკი: 

• LEGO და ფაზლები - იდეალურია სათამაშოა კოორდინაციისა და ლოგიკური აზროვნების ჩამოყალიბებისთვის.

• პლასტელინები და შემოქმედებითი სათამაშოები - ეს წინ გადადგმული ნაბიჯია სკოლის პერიოდისთვის. პლასტელინის ზელვა, ფორმების მიცემა და სხვა ხელოვნების აქტივობები აუმჯობესებს ბავშვის წვრილ მოტორიკას, რაც მნიშვნელოვანია წერისთვის, ხატვისთვის და სხვა ყოველდღიური ამოცანებისთვის.
  

• სპორტული ინვენტარი - ბავშვისთვის სპორტული ინვენტარით თამაში მრავალმხრივად სასარგებლოა და ხელს უწყობს მის ფიზიკურ, გონებრივ და სოციალურ განვითარებას. ბურთი, კალათბურთის ფარი,სკუტერი, ველოსიპედი, როლიკები და სხვა უამრავი სპორტული ინვენტარის არჩევა შეგიძლიათ ამ ასაკის ბავშვისთვის. 
  

სათამაშოები სკოლის ასაკის ბავშვებისთვის :

• LEGO და ფაზლები - ლეგო ყოველთვის იყო და არის ერთ-ერთი საუკეთესო არჩევანი. ის ავითარებს სივრცით აზროვნებას, კრეატიულობასა და პრობლემის გადაჭრის უნარებს. 8 წლის ბავშვისთვის შეგიძლიათ შეარჩიოთ უფრო რთული კონსტრუქტორები, რომლებიც მოითხოვს მეტ ყურადღებასა და მოთმინებას. LEGO და ფაზლები 

• სამაგიდო თამაშები - თამაში მოითხოვს სწრაფ რეაქციასა და გადაწყვეტილების მიღებას, რაც ავითარებს ბავშვის გონებრივ სისწრაფეს. სამაგიდო თამაშებიშეიძლება იყოს როგორც ინდივიდუალური, ასევე გუნდური თამაში, რაც ხელს უწყობს ბავშვს კონკურენციის უნარების განვითარებასა და გუნდურ თამაშში მონაწილეობას.
  

• შემეცნებითი სათამაშოები - მაგალითად სამეცნიერო სათამაშოები როგორც წესი, შეიცავს სხვადასხვა ექსპერიმენტს და აქტივობას, რაც ბავშვს აცნობს საბუნებისმეტყველო მოვლენებსა და კანონებს სახალისო და საინტერესო ფორმით.
  

მოკლედ რომ ვთქვათ ყველაზე სასარგებლო სათამაშოებია ის, რომლებიც ყველაზე მეტ მოქმედებას მოითხოვს ბავშვისგან. გაითვალისწინეთ, რაც უფრო მეტად უწევს ბავშვს გონებისა და სხეულის გამოყენება სათამაშოს გასამოძრავებლად, მით მეტს სწავლობს პატარა. მშობლებო, გახსოვდეთ თქვენი როლი ბავშვისთვის ასეთ მნიშვნელოვან პროცესში. გახსოვდეთ რომ თქვენი სიყვარული, ყურადღება და დრო,ბავშვისთვის ყველაზე ძვირფასია.